اسلام آباد کے نجی ہوٹل میں میں آتشزدگی کا واقعہ رونما ہوا ہے جہاں پاکستان سُپر لیگ (پی ایس ایل) کے افتتاحی ایونٹ میں شرکت کے لیے پی ایس ایل ٹیمیں ٹھہری ہوئی ہیں۔

میڈیا رپورٹس کے مطابق اسلام آباد میں جس نجی ہوٹل میں پی ایس ایل ٹیمیں اور غیر ملکی کھلاڑی مقیم ہیں، اس ہوٹل کے کے آؤٹر یونٹ جنریٹر میں آتشزدگی کا واقعہ رونما ہوا ہے، آتشزدگی کے اس واقعے کے بعد باعث لفٹ بند کردی گئی۔

میڈیا رپورٹ کے مطابق آتشزدگی پر قابو پالیا گیا ہے جبکہ ملکی و غیر ملکی کھلاڑی ہوٹل کے کمروں میں بحفاظت موجود ہیں۔

'آگ پر بروقت قابو پالیا گیا'

پاکستان سپر لیگ کے سی ای او سلمان نصیر نے نجی ٹیلیویژن سے گفتگو کرتے ہوئے کہا کہ آگ لگنے کے واقعے میں کھلاڑیوں یا فرنچائزز کے کسی فرد کو کوئی پریشانی نہیں ہوئی، آگ پر بروقت قابو پالیا گیا ہے۔

سلمان نصیر کے مطابق ہوٹل کے اندرونی حصہ میں آگ نہیں آئی، فائر بریگیڈ نے بروقت پہنچ کر آگ بجھا دی۔

انہوں نے یقین دہانی کروائی کی آگ بجھائے جانے کے بعد اب سب کچھ معمول کے مطابق ہے کوئی پریشانی کی بات نہیں۔

پی ایس ایل کا آغاز

پاکستان سپر لیگ سیزن 10 کا آج شام 7 بجے راولپنڈی کرکٹ اسٹیڈیم میں آغاز ہورہا ہے، افتتاحی تقریب میں معروف فنکار اپنے فن کا مظاہرہ کریں گے، اس موقع پر آتشبازی اور لیزر لائٹنگ کا بھی شاندار مظاہرہ ہوگا۔

ایونٹ کا افتتاحی میچ دفاعی چیمپئن اسلام آباد یونائیٹڈ اور لاہور قلندرز کے درمیان رات ساڑھے 8 بجے راولپنڈی اسٹیڈیم میں شروع ہوگا۔

واضح رہے کہ 34 میچوں پر مشتمل یہ ٹورنامنٹ 6 ٹیموں کے درمیان 18 مئی تک جاری رہے گا۔