سال نو میں پیٹرول کی قیمت میں 2 روپے فی لیٹر کمی متوقع، ہائی اسپیڈ ڈیزل کی قیمت میں 3.62 روپے فی لیٹر اضافے کا امکان

صنعتی ذرائع کے مطابق بین الاقوامی مارکیٹ میں پیٹرولیم مصنوعات کی طلب اور رسد کا کوئی بڑا مسئلہ نہیں ہے، تاہم جغرافیائی سیاسی صورتحال، خصوصاً شام کی حالات اور امریکی قیادت کی عالمی مسائل سے نمٹنے کی حکمت عملی کے سبب پیدا ہونے والی غیر یقینی صورتحال کی وجہ سے پیٹرولیم مصنوعات کی قیمتوں میں اتار چڑھاؤ دیکھنے کو مل رہا ہے۔

پیٹرولیم پر پریمیم 8.69 ڈالر فی بیرل عائد ہے، لیکن ڈیزل کی قیمت میں 3.62 روپے فی لیٹر اضافے اور پیٹرول کی قیمت میں 2 روپے فی لیٹر کمی کی منصوبہ بندی کی گئی ہے۔

اگلے پندرہ دنوں کے دوران پیٹرول کی قیمت 250 روپے 20 پیسے فی لیٹر رہنے کا امکان ہے، جبکہ ڈیزل کی قیمت میں اضافے کے بعد 259 روپے فی لیٹر تک پہنچنے کی توقع ہے۔

لائٹ ڈیزل آئل (ایل ڈی او) کی نئی قیمت 3 روپے 30 پیسے اضافے کے ساتھ متوقع ہے، جبکہ مٹی کے تیل کی قیمت میں 3.03 روپے فی لیٹر کا اضافہ ہو سکتا ہے، جس سے یہ 151.97 روپے فی لیٹر تک پہنچ جائے گا۔